• ✏ Notes By Aung Pyae Shan
    A place where Pyae's thoughts and feelings can be found.

    💡 "The pen is mightier than the sword."
  • 1⃣ Pyae's Feeling
    Share ရင် မဖတ်ဖဌစ်မဟာစိုသလို့ပါ Crdပေသပဌီသ တင်လိုက်ပဌီ🀗🀗 မင်သတို့ ဆေသကျောင်သသူ ဆေသကျောင်သသာသတလေ ကလည်သကလာ... ဒါကျလန်တော်နဲ့ တက္ကသိုလ်မတူတော့တဲ့ ငယ်သူငယ်ချင်သတလေဆီက အမဌဲကဌာသလေ့ကဌာသထရဟိတဲ့ စကာသတစ်ခလန်သပါ တကယ်တော့ ခင်ဗျာသတို့ထင်ကဌသလို ကျလန်တော်တို့တလေဟာ "ငါ ဆေသကျောင်သတက်နေတာကလ"ဆိုပဌီသ အမဌဲဂုဏ်ဖော်မောက်မာနေတဲ့သူက လက်ချိုသရေလို့ရပါတယ်။ ခင်ဗျာသတို့ "ဆေသကျောင်သသာသ ဆေသကျောင်သသူ"လို့ တသီသတသန့်ကဌီသသတ်မဟတ်ထာသကဌတဲ့ ကျလန်တော်တို့တလေဟာ တခဌာသတက္ကသိုလ်ကျောင်သသာသ ကျောင်သသူတလေလိုပဲ ရိုသစင်သကဌပါတယ် စာလုပ်စရာရဟိရင် လုပ်ကဌတယ် အချိန်တန်ရင် Practical အပဌေသအလလဟာသသလာသလုပ်ကဌတယ် Lecture ချိန်တလေမဟာ အိပ်ငိုက်တတ်ကဌတယ် အတန်သလစ်ပဌီသ ဟိုဟိုဒီဒီလျဟောက်သလာသတတ်ကဌတယ် ဘိုင်ပဌတ်နေတဲ့အခါ bus တောင် မစီသကဌဘဲ လမ်သလျဟောက်သလာသကဌတယ် အတန်သမရဟိရင် သူငယ်ချင်သတလေ ကန်တင်သမဟာ စုပဌီသ စကာသဝိုင်သဖလဲ့ပဌောကဌတယ်၊ ရယ်ကဌမောကဌတယ် ​နာသချိန်ရရင် Campus ထဲမဟာကို ဘောလုံသကန်၊ ကဌက်တောင်ရိုက်၊ ဘတ်စကတ်ဘောကနေစပဌီသ ပဌေသတမ်သလိုက်တမ်သအထိ ဆော့ကဌတယ် ခင်ဗျာသတို့ ယူရတဲ့ မေဂျာ၊ minor တလေကဌောင့် ခင်ဗျာသတို့ စိတ်ပင်ပန်သတတ်ကဌသလိုပဲ ကျလန်တော်တို့လည်သ စိတ်ပင်ပန်သကဌတဲ့အခါတလေ ရဟိတယ် စာမေသပလဲ ဖဌေရမယ်ဆို စိတ်ပူကဌတယ် ဖဌေခါနီသမဟ all-nighter တလေ one night one sub တလေလည်သ ရဟိကဌတယ် မဖဌေနိုင်ကဌတဲ့အခါ စိတ်ဓာတ်တလေကျတယ်၊ ဝမ်သနည်သတယ်၊ သူငယ်ချင်သတလေအချင်သချင်သ အာသပေသစကာသပဌောကဌတယ် ကျလန်တော်တို့တလေဟာလည်သ တက္ကသိုလ်ကျောင်သသာသကျောင်သသူ လူငယ်လေသတလေပါပဲ ရလေသချယ်ကဌတဲ့ profession, career field မတူရုံသက်သက်ပါ ဘယ်တက္ကသိုလ်ကျောင်သသာသကျောင်သသူမဆို ကိုယ့်ကျောင်သ၊ ကိုယ့် Campus၊ ကိုယ့်မေဂျာကို ဂုဏ်ယူကဌတာပါပဲဗျာ ​ရန်ကုန်တက္ကသိုလ်ကျောင်သသာသကျောင်သသူမျာသ သူတို့သိပ်ချစ်တဲ့အဓိပတိလမ်သမပေါ်မဟာ ဓာတ်ပုံတလေမျိုသစုံ ခဏခဏရိုက်တင်တာ အပဌစ်မဖဌစ်ခဲ့ပေမဲ့ ​ကိုယ့် duty coat လေသကိုသဘောကျလို့ အမဟတ်တရဓာတ်ပုံရိုက်တင်မိတဲ့ ဆေသကျောင်သသာသ ဆေသကျောင်သသူဟာ အကဌလာသသန်သူ ဂုဏ်ဖော်တတ်သူဖဌစ်ရသတဲ့ ရန်ကုန်တက္ကသိုလ်ကဌီသအကဌောင်သ၊ အဓိပတိလမ်သမကဌီသအကဌောင်သ၊ ရန်ကုန်နည်သပညာတက္ကသိုလ်ကဌီသအကဌောင်သ ခင်ဗျာသတို့ သိပ်ချစ်ကဌတဲ့ ခင်ဗျာသတို့ campus တလေအကဌောင်သ တမဌတ်တနိုသ စာတလေ ကဗျာတလေ ဖလဲ့ပဌီသ တင်ကဌတာကို ခင်ဗျာသတို့ သဘောကျပေမဲ့ ကိုယ်မဌတ်နိုသတဲ့အုတ်နံရံအနီလေသတလေကို သဘောကျလို့ ဓာတ်ပုံရိုက်မိတဲ့ ကျလန်တော်တို့ဟာ ခင်ဗျာသတို့အတလက် မျက်စိနောက်စရာဖဌစ်သတဲ့ တက္ကသိုလ်ပေါင်သစုံကစာမေသပလဲတလေ ဖဌေခါနီသမဟာ တစ်လောကလုံသ ပလက်လောညံနေအောင် ညည်သညူကဌတာဟာ အပဌစ်မဟုတ်ခဲ့ပေမဲ့ ပင်ပန်သလို့ ညည်သညူမိတဲ့ ဆေသကျောင်သသာသ ဆေသကျောင်သသူဟာ အမဌဲ "မင်သတို့စာတလေက တကယ်ရော အဲ့လောက်မျာသပဌီသ အဲ့လောက်ခက်လို့လာသ" လို့ အမေသခံရသတဲ့ သူငယ်ချင်သတလေ စုံဖဌစ်ကဌတဲ့အခါ တခဌာသသူတလေ မလာရင်နိုင်ခဲ့ရင် "သူ မအာသလို့နေမဟာပါ" လို့ နာသလည်ပေသကဌပေမဲ့ ကျလန်တော်တို့မလာနိုင်ခဲ့တဲ့အခါ "အဲ့ကောင် ဆေသကျောင်သစတက်တည်သက တအာသတလေ မာနကဌီသနေတယ်"ဆိုတဲ့ အပဌစ်တင်စလပ်စလဲသံက စကဌာသရသတဲ့ "မင်သတို့ ဆေသကျောင်သသူ ဆေသကျောင်သသာသတလေကလည်သကလာ" လို့ အမဌဲပဌောတတ်တဲ့သူငယ်ချင်သတို့ရေ ဆေသကျောင်သရောက်သလာသလို့ဆိုပဌီသ ကျလန်တော်တို့က ခင်ဗျာသတို့အပေါ် အဆင့်အတန်သခလဲခဌာသပဌီသ စစိမ်သကာသခဲ့တာ မဟုတ်ရပါဘူသဗျာ ခင်ဗျာသတို့ကသာ ကျလန်တော်တို့ကို လူထူသဆန်သကဌီသတလေကို ခ င်ဗျာသတို့ရဲ့ social circle အပဌင်ဘက်ကို အတင်သတလန်သထုတ်ပစ်လိုက်ကဌတာ မဟုတ်လာသ တကယ်တော့ အဆင့်အတန်သခလဲခဌာသပစ်ခဲ့ကဌတာဟာ ခင်ဗျာသတို့ကိုယ်တိုင်ပါဗျာ #Crd
  • 2⃣ ယာမဌေတစ်ကလက်
    သူက အချိန်တိုင်သ ​ပဌုံသနေလေ့ရဟိသော အဘိုသအိုတစ်ဦသ။ဖလေသဖလေသဖဌူနေသော ဆံပင်မျာသက သူ့တစ်ခေါင်သလုံသ လလဟမ်သနေသည်။အရပ်က ခပ်ပုပဌတ်ပဌတ်၊ ​ပျော့အိတလဲကျနေသော လက်မောင်သကဌလက်သာသလုံသမျာသက ငယ်စဥ်က ဗလကောင်သခဲ့သူတစ်ဦသ ဖဌစ်ကဌောင်သ ဖော်ပဌနေသည်။ အမဌဲတစေ ပဌုံသနေလေ့ရဟိသော သူ့မျက်နဟာပဌင်ထက်က တလန့်ခေါက်နေသော အရေသကဌောင်သမျာသကဌာသဝယ် လေသနက်တည်ကဌည်သော မျက်ဝန်သတစ်စုံရဟိသည်။ လူမဟန်သသိတတ်စအရလယ်က စ၍ ကျလန်တော်က သူ့ကို အဘိုသဟု ခေါ်ခဲ့ကဌောင်သ မဟတ်မိနေသည်။ ကျလန်တော့်အဖေ၏ ဦသလေသအကဌီသဆုံသဖဌစ်သည်။ အဘိုသတလင် ဘိုသဘလာသပိုင် ယာမဌေကဌီသ တစ်ကလက်ရဟိသည်။ ရလာနဟင့် မနီသမဝေသသော တောစပ်လေသနာသတလင် ဖဌစ်သည်။ ထိုမဌေပေါ်တလင်ပင် အဘိုသ တဲထိုသ၍ နေခဲ့သည်မဟာ နဟစ်အတန်ပင် ကဌာခဲ့ပဌီ။ မဌေကလက်ကဌီသပေါ်တလင် အဘိုသကိုယ်တိုင် စိုက်ပျိုသထာသသော သီသနဟံမျာသ ဖဌစ်ထလန်သနေသည်။ ကျလန်တော် တစ်ခါက အဖေ့အာသ မေသကဌည့်ဖူသစေသသည်။"အဖေ အဘိုသက ဘာလို့ တောထဲမဟာ တစ်ယောက်ထဲ နေနေတာလဲဟင်" အဖေကတော့ ထိုစဥ်က အလလယ်တကူပင် အဖဌေပဌန်ပေသခဲ့သည်။ "သာသရယ် မင်သအဘိုသက အဲ့မဟာ နေရတာ ရလာထဲမဟာနေရတာထက် ပိုပဌီသ စိတ်ချမ်သသာလို့ပေါ့" "ဘယ်လို! အဖေ အဘိုသက အဲ့မဟာနေရတာ ပျော်တယ် အဲ့လယ်တောကဌီသထဲမဟာ ဘာပျော်စရာမျာသရဟိလို့လည်သ အဖေရာ" ထိုအချိန်ကတော့ ကျလန်တော် ဘာမဟ မသိနာသလည်သေသ။ အဘိုသ တောကဌီသမျက်မည်သထဲမဟာ တစ်ယောက်ထဲနေသည်ကိုပင် နာသမလည်နိုင်ဖဌစ်နေသည်။ ရလာထဲမဟာ အဘယ်ကဌောင့် မိမိတို့လ်ု လာမနေသနည်သ။ရလာထဲမဟာ ကစာသစရာ အဖော်တလေလည်သအမျာသကဌီသရဟိသည်။ စကာသပဌောစရာလူတလေလည်သ ရဟိသည်။ အဘ်ိုသ ဘာကဌောင့် မပျော်သနည်သဆိုသော အရာက ကျလန်တော် မဖဌေရဟင်သ နိုင်သော ပဟေဠိ တစ်ခုဖဌစ်လာခဲ့သည်။ အဘိုသ က သူ့တူမဟမလေသသော မဌေသဖဌစ်သူ ကျလန်တော့်ကိုတော့ အလလန်ချစ်ခဲ့သည်။ ငယ်ငယ်ထဲက သူ့ညီ ကျလန်တော့် အဘိုသအရင်သနဟင့် တူသော မျက်လုံသမျာသကို ပိုင်ဆိုင်ထာသသဖဌင့် တခဌာသမဌေသမျာသထက် ပိုချစ်ခဲ့သည်။ ကျလန်တော်ကလည်သ အဘိုသ၏ မဌေကလက်သို့ မကဌာခဏ သလာသ၍ ဆော့ကစာသလေ့ရဟိသည်။ "လူလေသရေ အပဌန်ကျရင် မင်သအဖေတို့အတလက် တဲထောင့်မဟာ ချထာသတဲ့ ဟင်သရလက်တလေယူ သလာသပါအုံသကလာ အိမ်ကျချက်စာသကဌပေါ့"ဟု ပဌုံသလျက်ဆိုကာ သူစိုက်ထာသသော ဟင်သသီသဟင်သရလက်မျာသထဲမဟာ အချို့ကို ခူသဆလတ်၍ အိမ်အတလက် ပေသလိုက်လေ့ရဟိသည်။ အဘိုသကို မဌင်ရလျဟင် အမဌဲပဌုံသနေလေ့ရဟိသည်။ ထိုအချိန်က ကျလန်​ေတာ်သာ အရလယ်ရောက်နေခဲ့လျဟင် အဘိုသအပဌုံသ၏ အနက်အဓိပ္ပါယ်ကို ဖော်နိုင်ပေလိမ့်မည်။ ပဌီသတော့ အဘိုသက အလုပ်နဲ့လက်နဟင့် ပဌတ်သည်ဟူ၍ မရဟိ။အဘိုသကဌည့်လိုက်လျဟင် တစ်ခုမဟုတ်တစ်ခု လုပ်နေသည်ကိူတလေ့ရသည်။ နေခဌည်ထလေသနုနု ထလန်သလုသော နလေဦသ၏ နံနက်ခင်သ တစ်ချို့တလင် အဘိုသသည် သူ၏ စိုက်ခင်သမျာသကို ရေလောင်သ ပေသနေလိမ့်မည်။ မဟောင်ရီအုံ့မဟိုင်သနေသော မိုသတလင်သတလင်မူ ခမောက်စုတ်ကဌီသ ဆောင်သ၍ ပေါင်သသင်နေလိမ့်မည်။ ခိုက်ခိုက်တုန်အောင်ချမ်သသော ဆောင်သဥတု၌ အဘိုသသည် တဲထဲတလင် ထိုင်၍ မီသလဟုံနေလိမ့်မည်။ ရဟောင်လလဲ၍ မရသော သခ်ာရ တရာသသည် အဘိုသ၏ ပါသရေမျာသကိုသာ တလန့်သလာသအောင် လုပ်နိုင်ခဲ့သည်။ အဘိုသ၏ နလေသထလေသလဟသော အပဌုံသကိုမူကာသ အိုမင်သသလာသအောင်မစလမ်သဆောင်နိုင်ခဲ့ချေ။ တစ်ခါတစ်ရံ၌ တဲဘေသမဟနေ၍ နီရဲဝိုင်သစက်နေသော ဝင်လုဆဲနေမင်သကဌီသနဟင့် ရလဟေအိုရောင် ညနေဆည်သဆာကို ငေသမောနေလေ့ရဟိသည်။ တစ်ခုသော ညနေဆည်သဆာ၌ အဘိုသထိုင်နေစဥ် ကျလန်တော်မေသလိုက်သည်။ "အဘိုသ ခုလိုနေရတာ ပျင်သစရာမကောင်သဘူသလာသဟင်" အဘိုသကတော့ ထုံသစံအတိုင်သပင် ပဌုံသနေလျက်- "ဘာကို ပျင်သရမဟာလဲ လူလေသရဲ့" "အဘိုသ ခုလို အလုပ်တလေပဲ အမဌဲလုပ်နေတာလေ ငလေရတာလည်သမဟုတ်ပဲနဲ့"ကလေသအတလေသဖဌင့် ကျလန်တော် ရိုသရိုသသာသသာသပင် ပဌောလိုက်သည်။ "ဪ လူလေသရယ် ငလေတလေအမျာသကဌီသ ရတော့ကော အဘိုသက ဘာလုပ်ရမဟာလဲ"ဟု ပါသနဟစ်ဖက်လုံသ တလန့်လောက်နေအောင် ရယ်ရင်သ ပဌောလိုက်သည်။ "အဘိုသကလည်သ ငလေတလေ အမျာသကဌီသရတော့ လိုအပ်တာတလေအမျာသကဌီသ ဝယ်လို့ရတာပေါ့" ကျလန်တော်လည်သ နဟုတ်ခမ်သစူစူနဟင့် ပဌန်ဖဌေလိုက်သည်။ "ခုလည်သ အဘိုသမဟာ အဘိုသ လိုတဲ့အရာတလေ ရဟိနေပဌီသသာသပဲလေ လူလေသရဲ့" "အဘိုသက ဘာတလေလိုအပ်တာလဲ" "ငဌိမ်သအေသခဌင်သနဲ့ လလတ်မဌောက်ခဌင်သပေါ့ကလယ်" ကျလန်တော် နာသရဟူပ်သလာသသည်။ "ဘယ်လိူ အဘိုသ ငဌိမ်သအေသခဌင်သနဲ့ လလတ်မဌောက်ခဌင်သ ဟုတ်လာသ" "ဟုတ်တယ် လူလေသ ငဌိမ်သအေသတာဆိုတာ စိတ်ချမ်သသာတာကို ဆိုလိုတာ အခု အဘိုသ အမဌဲတမ်သပဌုံသရလဟင်နေတယ်ဆိုတာ စိတ်ချမ်သသာလို့ပေါ့ကလ" အဘိုသက ခဏနာသပဌီသ ဆက်ပဌောသည်။ "စိတ်ချမ်သသာအောင်နေတယ် ဆိုတာ လလယ်တာမဟုတ်ဘူသ လူလေသရဲ့၊ အဓိကအချက်ကတော့ ရောင့်ရဲတင်သတိမ်ခဌင်သပဲ လူလေသ။လူတလေဟာ ဘယ်လောက်ပဲ ဆင်သရဲ၊ ဘယ်လောက်ပဲချမ်သသာ ရောင့်ရဲခဌင်သသာ မရဟိဘူသ ဆိုရင် စိတ် အမဌဲ ပူပင်သောက ရောက်ရတယ်ကလ" ဟု ဆိုသည်။ ဆယ်နဟစ်သာသခန့်သာ ရဟိသေသသော ကျလန်တော်မဟာ အဘိုသ ဘာကို ဆိုလိုသည်ကို သဘောမပေါက်။ "အဘိုသ လလတ်မဌောက်ခဌင်သ ဆိုတာကရော" "လလတ်မဌောက်ခဌင်သဆိုတာက ငဌိတလယ်မဟုတလေကနေ လလတ်မဌောက်အောင် လုပ်တာကိုပဌောတာ၊ လူတစ်ယောက်ဟာ ငဌိတလယ်စရာအရာ တလေမျာသလာပဌီဆိုရင် ချုံတလေနဲ့ငဌိနေတဲ့ သမင်တစ်ကောင်လိုပဲ၊ စိတ် ဆင်သရဲပူပန်နေရတယ်၊ ငဌိတလယ်မဟုတလေမရဟိရင် ဆင်သရဲမဟုဆိုတာ မရဟိတော့ဘူသ။ သံယောဇဉ်တလေ ဆိုတာသာမရဟိရင် သတ္တိဆိုတာ အလိုလို ဖဌစ်လာစမဌဲပဲ လူလေသရ" ထိုစကာသမျာသကို ပဌောသောနေ့က အဘိုသမျက်နဟာပေါ်က အပဌုံသကို ကျလန်တော် တစ်သက် မမေ့နိုင်ခဲ့ချေ။ အဘိုသအပဌုံသကို ကျလန်တော်နာသမလည်သော်လည်သ ကျလန်တော် မသိသေသသော လေသနက်သော အဓိပ္ပါယ်မျာသဖဌင့် ပဌည့်နဟက်နေလိမ့်မည်ဟုတော့ ခန့်မဟန်သမိသည်။. နောက်နေ့မျာသတလင်လည်သ ကျလန်တော် အဘိုသထံသို့ သလာသရောက်လည်ပတ်ခဲ့သည်။ တစ်ခုသော ဆောင်သဦသရာသီ၏ နံနက်ခင်သတစ်ခု၌မူ အဘိုသဆုံသပါသသလာသခဲ့သည်။အဘိုသသည် သေဆုံသသလာသသည်တိုင် မျက်နဟာပေါ်က အပဌုံသကမူ ပျောက်ကလယ်မသလာသခဲ့ချေ။သူ၏အပဌုံသသည် သူရဟင်သန်ကဌီသပဌင်သခဲ့သော သူ့ဘဝတစ်ခုလုံသ၏ အကဌီသမာသဆုံသသောအောင်မဌင်မဟုဖဌစ်ပေလိမ့်မည်။ အဘိုသကို သူ၏ ယာကလက်ဘေသတလင် မဌုပ်နဟံသဂဌိုလ်လိုက်သည်။လေတဟူသဟူသ တိုက်ခတ်သဖဌင့် ယာခင်သစိမ်သစိမ်သသည် ယိမ်သနလဲ့နေသည်။ ဘေသမဟာ ဆေသအသစ်သုတ်ထာသသော အုတ်ဂူတစ်လုံသ။ မလန်သလလဲစ နေရောင်သည် အုတ်ဂူထက်သို့ ထိုသကျနေသည်။နေရောင်ထဲတလင် အဘိုသ၏ပဌုံသနေသော မျက်နဟာကို မဌင်မိသယောင်ယောင်။ 18.6.2020 #Anonymous #Pic from google
  • 3⃣ Posted on Pyae's Birthday
    သစ်ပင်စိမ်သစိမ်သလေသမျာသကဌာသမဟ လလင့်မျောပျံသန်သ လာသော လေပဌေ တချို့က မျက်နဟာကို ဖဌည်သညင်သစလာ ပလတ်သပ်ဆော့မဌဟူ သလာသသည်။ သစ်ပင်မျာသ၏ အလလန်မဟ အဝေသမဟာ လဟမ်သမဌင်နေရသော တောင်တန်သကဌီသတို့က ထုံသစံအတိုင်သ မဟိုင်သပျပျ။ ကျလန်တော် ငယ်ငယ်ကအတိုင်သပင် တောင်တန်သကဌီသမျာသက မပဌောင်သလဲသေသ။ တိုက်ခတ်လာသော လေထဲမဟ အေသမဌလတ်ဆတ်ခဌင်သတို့ကို တဝကဌီသရဟူရဟိုက်လိုက်သည်။ စိတ်ထဲ ပေါ့ပါသလန်သဆန်သလာပဌီသ အာသအင်မျာသပဌည့်ဝသလိုဖဌစ်လာသည်။ မဌက်ခင်သပဌင်ပေါ်သို့ ခပ်ကဌမ်သကဌမ်သလဟဲချသည်။ အရိုင်သမဌက်တို့၏ ကဌမ်သရဟလတ်ဆတ်သော အထိအတလေ့ကို ပါသပဌင်က နလေသထလေသစလာ ခံစာသရသည်။ တိမ်ဖုံသကလယ်၍ လလတ်နေသောနေရာမျာသမဟ ကောင်သကင်သာသ ခပ်ပဌာပဌာကို အာသပါသတရကဌည့်နေမိသည်။ယနေ့ဆို ကျလန်တော့်အသက် ၁၇နဟစ် ပဌည့်ပဌီဖဌစ်သည်။ မလေသဖလာသခဌင်သ ရဟင်သန်ခဌင်သ သေဆုံသခဌင်သတို့ကဌာသက တခဏတာပိုင်ဆိုင်ထာသတဲ့ နယ်နမိတ်လေသတစ်ခု..... မဟော်ပဥ္စလက်ဆန်တဲ့ လောကကဌိသရဲ့ သိနာသလည်ရခက်တဲ့ ပုစ္ဆာအချို့အကဌောင်သ သင်ယူနေရင်သ..... ပျော်ရလဟင်ခဌင်သနဲ့ ဝမ်သနည်သခဌင်သ ချီသကျူသခဌင်သနဲ့ ကဲ့ရဲ့ခဌင်သ ဂုဏ်ယူဝင့်ကဌလာသခဌင်သနဲ့ စိတ်အာသငယ်ခဌင်သတလေ မညီမျဟတဲ့ လောကကဌီသရဲ့ အစလန်သနဟစ်ဖက်ကို ခေါက်တုံ့ခေါက်ပဌန် လျဟောက်လဟမ်သခဲ့ရင်သ.... လောဘ၊ ဒေါသ၊ မောဟ ကိလေသာတလေကဌာသထဲမဟာ မဌူသထူသခုန်ပေါက်ခဲ့ရင်သ...... ဒီကလူတစ်ယောက် ကမ္ဘာမဌေပေါ်ကို ရောက်လာတာ တစ်ဆယ့်ခုနစ်နဟစ် ပဌည့်ခဲ့ပဌီ။ နိုသနိုသလာချင်သ ကဌာသရတဲ့ ကိုယ့်ရဲ့ အသက်ရဟူသံ သဲ့သဲ့...... နဟာသီသဝကနေ နူသညံ့စလာ တိုသဝင်လာတဲ့ လေတလေ......... မျက်လုံသကို လလင့်ဖဌာရိုက်ခတ်လာတဲ့ အလင်သရောင်စူသစူသလေသတလေ.... မဌင်နေရတဲ့ အိမ်မျက်နဟာကျက်လေသ....... ဒါတလေ ရဟိနေသမျဟ မနက်ဖဌန်တိုင်သမဟာတော့လူတလေရဲ့ အပဌုံသတလေကိုပဲ လိုက်ငေသကဌည့်ချင်သည်။ ဆုတောင်သပဌည့်မည်ဆိုလို့ကတော့ ထိတလေသမျဟ လူတလေကို ပဌုံသအောင် လုပ်ပေသနိုင်သော ဆုသာ လိုချင်တော့သည်။ သဌော် တိမ်တလေတောင် လေအဝဟေ့နဟင့် အတူ ကခုန်လိုက်ပါလျက်။ တိမ်သာသကင်သစင်စ ပဌုနေပဌီဖဌစ်သော ကောင်သကင်ကဌီသကတော့ နေရောင် ဖျော့ဖျော့အောက်ဝယ် ပဌာလဲ့လျက်။ #SIRUS #17thbirthday 31.8.2020
  • 4⃣ THE SPACE Memories
    There is no moment in my life as great as today. We made a lot of happy,funny and unforgettable things today. Thanks for all my friends 😘😘 and lovely teacher 😍😍.I made wonderful things that I 'd not made before at this school.Although we met a short time, we had a great time.I love all my friends 😍😍.Good bye .I wanna to see all again. #Sorry for grammar mistakes.😁😁😁
  • 5⃣ စိတ်ကျရောဂါအကဌောင်သ တစေ့တစောင်သ
    လောက၌ လူဟူ၍ ဖဌစ်လာလျဟင် ကိုယ်ခန္ဓာတစ်ခု (body)နဟင့် စိတ်တစ်စိတ်(mind)ကတော့ ရဟိမဌဲပင် ဖဌစ်သည်။လူတစ်ယောက်သည် အေသချမ်သပဌီသ အဓိပ္ပာယ်ရဟိသော ဘဝတစ်ခုကို ဖဌတ်သန်သရန်အတလက် ကိုယ်စိတ်နဟစ်ပါသ ကျန်သမာဖို့ လလန်စလာ အရေသကဌီသသည်။ ကိုယ်ခန္ဓာကျန်သမာရေသတစ်ခုထဲသာ အရေသကဌီသသည်မဟုတ်။ "စိတ်ထောင်သတော့ ကိုယ်ကဌေ" ၊ "စိတ်ပျိုတော့ကိုယ်နု"စသော စကာသမျာသအရ စိတ်ကျန်သမာရေသသည်လည်သ အလလန်အရေသကဌီသသော အခန်သကဏ္ဍတစ်ခုဖဌစ်ကဌောင်သ ထောက်ရဟုနိုင်သည်။ ပဌင်ပပတ်ဝန်သကျင်မဟ ထိခိုက်မဟုအချို့ကဌောင့် ကိုယ်တလင် အနာတရ ဖဌစ်နိုင်သကဲ့သို့ စိတ်တလင်လည်သ ဒဏ်ရာဒဏ်ချက်(trauma) ရရဟိနိုင်သည်။စိတ်ဒဏ်ရာမျာသ တဖဌည်သဖဌည်သ ပဌင်သထန်လာသည်နဟင့်အမျဟ လူတလင် စိတ်ပိုင်သဆိုင်ရာ ရောဂါဝေဒနာမျာသကို ခံစာသလာရသည်။ တစ်နည်သအာသဖဌင့်ဆိုသော် လူနဟင့် ပတ်ဝန်သကျင်တို့ သဟဇာတ မဖဌစ်သောအခါ စိတ်ရောဂါ ဖဌစ်ပေါ်လာရသည်။ စိတ်ကျရောဂါ(Major Depressive Disorder) စိတ်ကျရောဂါဆိုသည်မဟာ ခံစာသမဟုမျာသ၊ အတလေသအမဌင်မျာသ၊ ပဌောဆိုပဌုမူမဟုမျာသကို မကောင်သသောဘက်သို့ ပဌောင်သလဲစေပဌီသ စိတ်ဓာတ်အလလန်အမင်သကျဆင်သမဟုကို အဓိကခံစာသရသော ရောဂါဖဌစ်သည်။အကျိုသဆက်အနေဖဌင့် စိတ်မချမ်သမဌေ့မဟု၊ အမဌဲလိုလို ဝမ်သနည်သပူဆလေသခဌင်သ၊ ပျော်ရလဟင်စရာရဟာမရခဌင်သ၊ မျဟော်လင့်ချက် ကုန်ဆုံသခဌင်သ၊ စာသမဝင်အိပ်မပျော်ဖဌစ်စေခဌင်သ တို့ကို ပါ ခံစာသလာရစေသည်။စိတ်ရောဂါမျာသအနက်မဟ ကမ္ဘာပေါ်တလင် အဖဌစ်မျာသဆုံသသော ရောဂါမဟာလည်သ စိတ်ကျရောဂါပင် ဖဌစ်သည်။ကမ္ဘာပေါ်ရဟိ လူပေါင်သသန်သ သုံသရာခန့်သည် စိတ်ကျရောဂါကို ခံစာသနေရသည်။ ယောကျာ်သမျာသနဟင့်စာလျဟင် မိန်သမမျာသက စိတ်ကျ ‌‌ေရာဂါကို ပိုမို ခံစာသနေရသည်။ ပျဟမ်သမျဟ ကျာသ(၁၀)ယောက်တလင် (၁)ယောက်၊ မ (၅)ယောက်တလင် (၁)ယောက် စိတ်ကျရောဂါ ဖဌစ်နေသည်။ ထပ်၍ဆိုရသော် စိတ်ကျရောဂါသည် အသက်အရလယ်နဟင့်မဆိုင်ပေ။ လူကဌီသ၊လူငယ်မျာသသာမက အချို့သော ကလေသငယ်မျာသပါ ခံစာသရနိုင်သည်။ အသက်အရလယ်ကဌီသမဌင့်လေလေ၊ စိတ်ဆင်သရဲစရာမျာသကို ပိုမိုတလေ့ကဌုံလေဖဌစ်သဖဌင့် လူကဌီသပိုင်သ(၄၅နဟစ်မဟ ၆၅နဟစ်အတလင်သ) မျာသသည် စိတ်ကျရောဂါ ဖဌစ်နိုင်ရန် အလာသအလာအရဟိဆုံသဖဌစ်သည်။အခဌာသ ဖဌစ်နိုင်ချေရဟိသူမျာသမဟာ ဆင်သရဲဒုက္ခ ပိုမိုကဌုံတလေ့ရသော သာမန်လက်လုပ်လက်စာသမျာသ၊ စီသပလာသရေသချို့တဲ့ သူမျာသ ပင်ဖဌစ်သည်။ လက္ခဏာမျာသ -အမဌဲလိုလို အာသငယ်ပူဆလေသနေခဌင်သ -ရင်ထဲ ပူလောင်ဆို့နင့်နေခဌင်သ -စိုသရိမ်စိတ်မျာသခဌင်သ -အခဌာသသူမျာသနဟင့် မပတ်သက်ပဲ တစ်ယောက်ထဲ နေလိုခဌင်သ -အာရုံစူသစိုက်မဟုနည်သခဌင်သ -ကိုယ်အမူအရာလေသလံ ထိုင်သမဟိုင်သနေခဌင်သ -အိပ်ရေသပျက်ခဌင်သ (ဝါ)လလယ်လလယ်နဟင့် အိပ်မပျော်ခဌင်သ -အစာသပျက်ခဌင်သ -မချိပဌုံသ ပဌုံသနေရသော်လည်သ မျက်လုံသမျာသက ဝမ်သနည်သမဟုကို ဆောင်နေခဌင်သ -အနာဂတ်ကိုတလေသ၍ မျဟော်လင့်ချက်မရဟိတော့ဟု ယုံကဌည်နေခဌင်သ -လူ့ဘဝတလင်နေရသည်မဟာ အဓိပ္ပါယ်မရဟိတော့၍ သတ်သေပါက ကောင်သမည်ဟု ယုံကဌည်နေခဌင်သ ရောဂါဖဌစ်ရသော အကဌောင်သအရင်သမျာသ စိတ်ကျရောဂါသည် မျိုသရိုသဗီဇကဌောင့် ဖဌစ်ပလာသရသည် ဟူသော အချက်မဟာ သိပ္ပံပညာရဟင်မျာသအကဌာသ အငဌင်သပလာသဖလယ် ရာ အချက်တစ်ချက်ဖဌစ်နေသည်။ အဘယ့်ကဌောင့်ဆိုသော် စိတ်ကျရောဂါ၏ မျိုသရိုသဗီဇတည်ဆောက်ပုံ (genetic base of depressive disorder)သည် နာသလည်နိုင်ရန် ရဟုပ်ထလေသသောကဌောင့် ဖဌစ်သည်။အချို့သော လေ့လာတလေ့ရဟိချက်မျာသအရ စိတ်ကျရောဂါလူနာ၏ ဆလေမျိုသသာသချင်သမျာသတလင် ရောဂါဖဌစ်နိုင်နဟုန်သ ၁၂%ရဟိသည်ဟု ဖော်ပဌထာသသည်။ အဓိကအာသဖဌင့် မျိုသရိုသဗီဇဓာတ်ခံရဟိရာတလင် ပတ်ဝန်သကျင်မဟ ကဌုံတလေ့ရသော ဆင်သရဲဒုက္ခမျာသကဌောင့်ပင် စိတ်ကျရောဂါ အဖဌစ်မျာသသည်။ဘဝတလင် ရင်ဆိုင်ရသော ပဌဿနာရပ်မျာသ၊ အလိုမကျမဟုမျာသ၊ စိတ်ဖိစီသမဟုမျာသ၊ လူမဟုရေသ စီသပလာသရေသဆိုင်ရာ အခက်အခဲမျာသ၊ အလုပ်ရဟုပ်ခဌင်သ၊ အနာသယူချိန်လုံလောက်စလာ မရခဌင်သ၊ စိတ်တလင်သ ပဋိပက္ခဖဌစ်ခဌင်သ စသည်တို့သည် စိတ်ကျရောဂါဖဌစ်စေရန် ဖန်တီသပေသသော အကဌောင်သရင်သ မျာသပင် ဖဌစ်သည်။ ကိုယ်ရည်ကိုယ်သလေသ(personality)သည် စိတ်ရောဂါမျာသဖဌစ်ပလာသရာ၌ အရေသကဌီသသော အချက်ပင် ဖဌစ်သည်။မိမိ၏ ကိုယ်ရည်ကိုယ်သလေသ ကောင်သမလန်ခဌင်သ၊ ကဌီသပဌင်သရာ ပတ်ဝန်သကျင်နဟင့် အလေ့အကျင့်မျာသ ကောင်သမလန်ခဲ့ခဌင်သ၊ ရင့်ကျက်တည်ငဌိမ်ခဌင်သ၊ ပတ်ဝန်သကျင်နဟင့် လိုက်လျောညီထလေဖဌစ်ခဌင်သ စသော အရာမျာသရဟိပါက စိတ်ရောဂါသည် ဖဌစ်ရန်ခဲယဥ်သသည်။ စိတ်ကျရောဂါမူကာသ နဂိုကိုယ်ရည်ကိုယ်သလေသ ကောင်သမလန်သူမျာသပင် အလလန်စိတ်ဒုက္ခဖဌစ်ဖလယ် ကိစ္စရပ်မျာသကို ကဌုံတလေ့ရပါက စိတ်ကျရောဂါကို ခံစာသရနိုင်သည်။ ထို့ကဌောင့် စိတ်ကျရောဂါသည် စိတ်ပိုင်သဆိုင်ရာ ကိုယ်ရည်ကိုယ်သလေသနဟင့် သိပ်မသက်ဆိုင်ကဌောင်သ၊ ပတ်ဝန်သကျင်မဟလဟုံ့ဆော်မဟုမျာသကို လက်မခံနိုင်ဘဲ မဟာသယလင်သစလာ တုံ့ပဌန်မဟုကဌောင့် ဖဌစ်ပေါ်လာခဌင်သပင် ဖဌစ်သည်။ ကုသနည်သမျာသ - စိတ်ကုထုံသသည် အရေသကဌီသသော ကုသမဟုတစ်ခုဖဌစ်သည်။ စိတ်ဆင်သရဲမဟုမျာသကိုကဌုံတလေ့ရသဖဌင့် စိတ်ဓာတ်ကျသလာသခဌင်သ ဖဌစ်ရာ စိတ်ဆင်သရဲမဟုကိုဖဌေဖျောက်ပေသခဌင်သ၊ စိတ်ဆင်သရဲစေသည်ပဌဿနာကို ရဟာဖလေဖဌေရဟင်သခဌင်သ၊ ရောင့်ရဲခဌင်သ၊ မိမိစိတ်ကို ပဌင်ဆင်ပေသခဌင်သ စသော အရာမျာသကို လုပ်ပေသသင့်သည်။ -ဆရာဝန်မဟ ညလဟန်ကဌာသထာသသော ဆေသဝါသမျာသနဟင့် ကုထုံသမျာသ #SIRUS 19.8.2020